[2] Особое прошение. О путешествующих

Описание

Записка читается священником во время особых прошений, включаемых в состав Сугубой ектении на Литургии.

Священник: Стопы человеческия исправляяй, Господи, призри милостивно на рабы Твоя (имена) и, простив им всякое прегрешение, вольное же и невольное, благослови благое намерение совета их, и исходы, и входы со путешествием исправи, прилежно молим Ти ся, услыши и помилуй. Хор: Господи, помилуй (трижды).

Священник: Иосифа от озлобления братий его преславно свободивый, Господи, и во Египет того наставивый, и благословением Твоея благости во всем благополучна сотворивый, и сих рабов Твоих (имена) путешествовати хотящих благослови и шествие их безмятежно и благополучно сотвори, молим Ти ся, услыши и помилуй. Хор: Господи, помилуй (трижды).

Священник: Исааку и Товии Ангела спутника пославый и тем путешествие и возвращение их мирное и благополучное сотворивый, и ныне, Преблаже, Ангела мирна рабом Твоим (имена) нами Тебе молящымся посли, во еже наставити их на всякое дело благое и избавити от враг видимых и невидимых и от всякаго злаго обстояния, здраво же, мирно и благополучно к славе Твоей возвратити, усердно молим Ти ся, услыши и помилуй. Хор: Господи, помилуй (трижды).

Священник: Луце и Клеопе во Еммаус спутешествовавый и весело во Иерусалим возвратитися Твоим преславным познанием сотворивый, спутешествуй Твоею благодатию и Божественным благословением и ныне рабом Твоим сим (имена), нами Тебе прилежно молящимся, и во всяком деле блазе, к славе Пресвятаго Твоего Имени, благопоспеши, во здравии и благополучии соблюдая и возвращая во время благоподобно, яко Всещедрому Благодателю, молим Ти ся, скоро услыши и милостивно помилуй. Хор: Господи, помилуй (трижды).